第一篇，講自己啦，亦順便紀錄下心路歷程戴返頭盔先，我就係好多人口中靠樓增值的死廢中!!!
公屋仔出身，父母異離，睇住老母一人打兩份工，都唔生性，讀書只靠小聰明，去到高中終於符碌唔到，HKCEE第一年9分，重考12分，碌上中六，HKAL又係仆直，叫做中英數合格，讀IVE，認識老婆大人。
畢業撞正03沙士，老竇俾錢過英國讀一年拎個degree，04年回港開始職業生涯。前面講左, 我係靠樓增值，工作都有幫助，但日後詳談。
樓 ---
詳細買買賣賣唔講，但現在一層收租一層自住，叫做比上不足比下有餘，生活確實多左保障(但未到財自)，玩法亦千變萬化，總結由2007年至2019年的樓市生涯，有幾個重要位想分享下:
1. KEEP住樓換樓
第一層樓2011年沽執100萬，當時100萬真係大數，4年層樓升一倍，身邊有唔少朋友沽左等跌，結果等到依家............好彩我無咁做，盈利放返落去做首期再置業(當時大女已經出世, 老婆都陀緊第二件)，我有實際需要，所以無咩好考慮。
2. 2014年將自住樓一拆二
在此要衷心感謝諗樣兄，佢係我第一個接觸講投資嘅blogger，果時真係眼界大開。結果係2014-2019食盡兩間樓嘅升幅
3. 認清大趨勢
由2014開始睇左好多好多文章 (80后, STARMAN, 諗樣兄, 曾淵滄，龔成，但主要係樓同理財概念，真正了解到現金/資產的未來變化，知道"時間係我地最好嘅朋友"，利用平息借貸做槓桿，買入資產，再利用時間令現金貶值，減少還款，但同時資產亦隨著時間增值。
4. 控制物慾
係睇文章嘅過程, 了解到 "想買" 同"要買"的分別，當我年薪200萬的時侯，身邊同事買錶買車買鑽石嘅時候，我買債買樓買樓買REITS買ETF。我地從來唔食自助餐(人地請就唔拘)，最貴果隻錶都係APPLE WATCH，買衫去UNIQLO，屋企用品裝修都淘寶，想買好少少都係等BLACK FRIDAY網購(AMAZON)
講住咁多, 有時間下次見!
沒有留言:
發佈留言